Premio Sw Libre de Igalia

Os alumnos que presenten nestas datas os seus Proxectos Fin de Carreira nalgunha das tres universidades galegas poden presentarse aínda ao Premio PFC Sw Libre, unha estupenda iniciativa que organiza anualmente a empresa Igalia.

Como indican nas bases,
"o concurso consiste na presentación e desenvolvemento dun PFC que cree un novo proxecto de Software Libre ou ben mellore un existente, utilizando unha implementación libre de calquera linguaxe de programación.

Requisitos para a participación

1. Os concursantes deberán estar matriculados nalgunha das tres universidades galegas e os seus PFCs deberán ser defendidos, cunha nota mínima de 5.0, nalgunha das convocatorias (ordinaria ou extraordinaria) do ano académico 2007/2008 (entre febreiro e outubro do 2008).
2. O código deberá estar baixo calquera das licencias de software libre así consideradas pola Free Software Foundation (FSF) ou a Open Source Initiative (OSI)."

Igalia é unha empresa enormemente comprometida co desenvolvemento do software libre en Galicia, a través de iniciativas como este concurso, a organización do Máster de Software Libre que organiza coa Universidade Rey Juan Carlos e Caixanova (non confundir co Máster en Consultoría de Software Libre que organizamos no campus de Ourense), ou a activa participación na creación de AGASOL, a Asociación de Empresas Galegas de Software Libre.